يا سيادة .. يا فخامة يا جناب رئيس الأبْعَدِيَّة حتى لو كنت واحد من رعايا الجان و جيت لنا ف غـَفـْلـَة كانت م الزَّمان متخـَفـِّي بين سِبْحَة و طقيَّة و جَلـَّبيَّة خِفّْ حَبَّة دا احنا بيك و انتَ بينا تبقـَى راعي للرَّعِيَّة أصْبَحْنا نتـْشـَهـَّى الرِّغيف مِن غير غموس بَس قمح يكون نضيف ولاَّ هِدْمَة مِن طـَرْح أرضي الطيبة ف البـَرْد دافية و حنيِّنة في الصِّيف نفسي أشم نِسْمِة هـَوَا مِن غير تلوُّث نِسْمَة صابْحَة مِشْ زفير خنزير .. و أَنـْجَس جِه بإيد الإيدز صافح و احنا فاكرينه يصالح نفسي أفرَح بالجنيه أبوس جبينه استخـَبَّى في عرينه .. م البطالة و الدَّمار و ادَّفـَى في حُضنـُه.. و هوَّ واقف ع الدولار نفسي أرجَع تاني شـَهـْم سلاحي رابض ع الحدود رُعْب للأعداء و مأمن للوطن مش لِفـَض مظاهرات و سَطر ف كتاب العَفـَن \ / \ يا عَمِّنا نـَشـِّفـْت ريقنا و دَمـِّنا لو كـُنـَّا نعرف المِسْتخبِّي كنـَّا انتحرنا كـُلِّنا قبل ما تيجي العصابة تنهـَش تاريخنا و لـَحْمِنا \ / \ إوْعَى تقول فات الأوان نـُص اللي بَرَّه في بنوك الأُلعبان استثمره .. و تاجر يا بيه إبني المصانع و المساكن و المزارع إرفع لنا راس الجـِنِيه هتعود بلدنا زَيّْ ما كـُنـَّا و أحسَن مِن زمان ساعتها نهتف .. مِن قلوبنا رد رئيس الأبْعَدِيَّة : \ / \ يا رئيس الأبْعَدِيَّة ؟!! إيه يا خـَلق لِسَّه نايْمَة .. أعمل ايه .. عالـَم غـَبيَّه آل رئيس الأبعديَّة !! إمتى كانت أبْعَديَّة ؟ قولوا عِزبة أو وِسيَّة خدْتـَها منكم شطارة و بشطارتي أبيع عنيكم للي يبني لي عمارة أو يـِعَكـِّمني الدولار مش كفاية شقيت عشانكم ؟ أرض خِصبة بجهلكم كانت مزارع النهاردة بُصُّوا شوفوا ابراج .. مصانع تنتج الشيبسي اللي جنن العيال مِن نِفايات البطاطس جـِبت كام مليون ريال اللي أكلوا مِنـُّه ماتوا ؟ .. ألف رحمة و نور عليهم الأكادة .. !! رغم أرض اتسرطنت و المباني اتـْهـَدِّمت و البطالة و الزبالة و الإدارة لِسَّه عايشين يضحكوا و ينـّكـِّتوا لأ و إيه .. و مدمنين شرا الجرايد و يكتبوا شِعر و قصايد و يصدَّقوا أحْلـَى نـُكته مصدقينها إني رئيس الأبعديَّة مانا بعتكم و بـِعتها ِمن يوم م خصخصت المصانع و الشـَّوارع و اللي نازل و اللي طالع و الرَّعيَّة تـَعْبان عشانكو يا حَسرتي ما حَد مِنـْكو حَسّْ بـِيَّه !
أضف تعليقا
من مصر
جواب كلماتة بسيطة ولكنها معبرة جدا
بحييك جدا على الكلمات المعبرة عن واقعنا
المؤسف .....مع تحياتى
من مصر
أستاذى العزيز مصطفى ..
كلمات عبرت عن واقعنا المؤلم المرير ..
ورد لا أظن أنه حتى قد يقوله ..
فلا أحد يسمع شكوى المظلوم ..
ولا يوجد من يهتم طالما فى برجه العالى يعيش سعيداً .
حقاً كتبت فأبدعت ..
وأبدعت فأمتعتنا بما قرأنا ..
أرجو أن تعذرنى لتأخرى فى التعليق على تحفتك الرائعه .
لك منى كل الود والإحترام .
ودمت بخير .
من البحرين
شعرتُ بصدق الحرف هنا ..
بصرخته الموجوعة ..
بألمه المنزوع قسراً .
بأمله المذبوح طعناً ..
بلهيبه الممتد في الأجساد .. فيحولها يوماً بعد يوم إلى بقايا أشباح ..
الله يكون في عونكم وعوننا .. فعندنا خير كما عندكم ..
لكَ تحية صباحية لكلمكَ الصادق ..
.. وهـــــم ..
من مصر
الله بجد ايه ده حضرتك مبدع جدا
بجد انا فرحانه كتير انى دخلت عالمك البسيط المعبر الرائع
ده شرف ليا انى اقرا كلام جميل بالشكل ده
آآآآآه يا بلدى حزينه عليكى بقيتى زى الطفل الضائع عايزه رعايه عايزه حنان عايزه احتضان
انا بحبك يا بلدى مهما حصل ومهما اتعمل فيا فيكى بحبك لاخر نقطه فى دمى
اختك فى الله علا 
وِ لِسَّة بـِنـْهاتي يا دنيا و ننوَّر فِلاش ؟!
و نعلن لجناب سعادته ع اللي ضاع مِنـَّا
ببلاش ؟!
و لِسَّة مصدَّقين انه مش عارف بلاوينا
التقيلة ؟!
كل الحكاية إنه جاي م الأصل بايع ..
و عارف كل حاجة ..
بس وِدْن مِن طين
وودْن مِن طناش
**
الصديقة الجميلة / ابنتي دنيا
لقلمك أحني هامتي تقديرا
لأتمنى إشراقة مداده بدوام الحياه
دُمتِ بالقلب
الرقيقة - الجميلة / سندريللا
تشرَفتُ بتوقيعك و زيارتك و تعليقك
راجيا دوام التواصل
مع أرق تمنياتي بالسعادة و التوفيق
الرقيقة الغالية / أماني
مِن رُبع قرن أو يزيد
و الدنيا تجري للأمام
و احنا كمان بنجري .. بَس لـ وَرَا
مستعبطين .. ما في حيلتنا غير كلام
و هوَّ يتفنن في صـُنع الهموم و النـَّاْوَرَه
يضحك علينا بـ شيل وزارة
و تأليف وِزارة
آخر وِزارة جاية تنظف الجيوب
أو أي حاجة لِسَّه فينا مِنـَوَّرة
**
أخيتي الجميلة / أماني
لك شوق
و لقلمك / عطرك هنا
عظيم شكري و محبتي
زمن الوّهـّن قد عَمَّ خيره على الوَطن ..
كل الوَطن
مات الكِبار
و القِزمُ مشغولٌ بالتـَضـَرُّعِ للوَثن
و الوَثـَنُ .. لا دين .. لا عهدَ له .. لا
قـَسَم
لكنه يملِكُ حفناتِ الدنانير
و عصى .. يُخـَوِّفُ بصوتها خائفٌ .. عَفِن
**
الغالية - الرقيقة / وَهم
معك .. ننتظر إشراقة الأمل
من رَحمِ الغـَد..
لك باقة ود
الأختُ الرقيقة / علا
فخرٌ و شرف عظيم إشراقتك
فهل أطمع في دوامها ؟
شكرا غاليتي
لك آيات الود
و أرق الأمنيات
من المملكة العربية السعودية
استاذى.......الفاضل
بجد مش عارفه اقول ايه ....
بس احساسك وكلامك جميل جدا
اولا عايزة اشكرك ارد لك الزيارة
اتشرفت فيه جدااااااا
عسى ان يدوم التواصل بيننا..
تقبل تحياتى
شذى المصري
من سوريا
اجـرى ياابن أدم جريك ملوش لزوم
اجـرى مهما تجرى راكباك الهموم
غلبان فقير حيران ..ولساك كتوم
اجرى ياابن ادم
اجرى ياابن ادم اجرى جرى الوحوش
عايش مع ناس ديابه ملاعين مابيرحموش
واحلف مهما تحلف برضوا مابيصدقوش
واجرى يابن ادم
اجرى يابن ادم مالكش غير ربنا
تقبل مرور الهدهد 
من مصر
سلاحي رابض ع الحدود
رُعْب للأعداء و مأمن للوطن
مش لِفـَض مظاهرات
صدقت.. و هذه أمنيتي أيضاً
هتعود بلدنا زَيّْ ما كـُنـَّا و أحسَن مِن زمان
ساعتها نهتف .. مِن قلوبنا
بالروح بالدم
نفديك يا فلان
نفسي أعيش و أشوف اليوم ده اللي يجيلي نفس أقول فيه كده
الرد لا يصلح علشانه رد
رائعة جدا رؤيتك للموقف و تعبيرك عنه
تقبل مودتي و إحترامي
مها حمزة
أضف تعليقا
<<الصفحة الرئيسية
من مصر
يا رئيس يا زعيم
ياللى قالو دايماً عنكـ عظيم
يا كبير يا همام
ياللى كنت دايماً فى أعلى مكان
ربونى دايماً على انكـ أنت أب
قدوه بجد
يوم بعد يوم لقيت ملايين بتروح
أطفال بتموت
غريبه فى بلدى كمان؟
هو فى أب بيقتل أولاده؟
ولا أب بياكل أكل أطفاله؟
هو فى أب ومسؤل
بمصالحه هو وبس مشغول؟
ياكبير الهمه وراعى الأمه
بيقولو كل حاجه اتسرطنت
والأورام كترت وأستوطنت
وقالولى كمان عن شبابنا اللى بيموت غرقان
وقلولى كتير عن حوادث قطرات
وغرق سفن وحاجات وحاجات
يا زعيم بص بصه من قصركـ العظيم
على الراعايا المساكين والمجروحين والجاعنين والتعبانين
الرائع// درش
أعتذر عن خربشتى هنا
ولكنها مشاعر كل مواطن يحلُم بالأمان
فلكـَ مودتى واحترامى
لما أبدعت به هنا
كن دوماً بهذا الرقى
؛؛دنياا؛؛