ماهو أصله عبيط مش قلت عبيط ! ـــــــ مصطفى ، في 20/11/2009
و مادام عبيط
انا برضه حويط و نبيه و غويط
دَنا سارق كـُـحْلـُه مِن عينه
دَنا خاطف قمرُه من ليلـُـه
هـَـرَّبت الشمس بلاد بَرَّه
و بيضحك .. مالي البيت زغاريط
آل ايه مش راضي بابن الكلب
طب ليه ؟
هوَّ ابن الكلب ، أبوه مش كلب ؟
دا جراب الحاوي مليان كدب
أرسِمْله الخـَـيَّه يُقع فيها
اللعبة .. بفلوسه شاريها
أقلبها عليه تسَـيَّح دَمُّو
يشبط ف اللعبة يهـِـيص بيها
يظهرلـُه ابن الكلب غاويها
يهتف .. يحميكوا رب البيت
*
*
.
.
الجمعة, 20 نوفمبر, 2009
السبت, 19 سبتمبر, 2009
سنين و ايَّام ,, و قلبي نبضه ليك مرسال بيحلفلك .. مفيش غيرك يروق له وصال حبيبي ارحم متعرفش ان البعاد قتـَّال ؟ متعرفش ان الثواني تمُر من غيرك سنين طوال ؟ متعرفش اني بموت ف اللحظة ميت مرَّة ؟ متعرفش ان الحياة دونك ريحتها و طعمها مـُـرَّة ؟ و شمسها غايبة بالمـَرَّة .. قـَمَرها ، نجومها ، يتشاقوا ، إذا تبعت لهم نظرة وَحَشهُم السَّنا في وَجهك وَحشهم فرحة السَّهرة و انا و عُودي بنستـَنـَّى نـَغـَم صوتك و شوق عصفور للمَغـْنـى مع صوتك و لا يفوتك ... ندا قلبي بيحلفلك يا عمر العمر انا بيتك
فراقك صعب بالمَرَّة
ــــــــــ
الثلاثاء, 15 سبتمبر, 2009
و الاقي في انتظارك مُتـْعِتي
أتخيِّلك جيتي في معادك
تـِفـُرَح عيدان القمح و اكواز الدُّرة
و المَيَّه تضحك ف الجداول
و الطير يغني
أما قلبي ...
يسْبَق خـُطاه
و كل نـَبـْضَه ..
تِنـْبُر حروف اسمك
غنوَة على وَتـَر الحياة
يمسك ايديكِ و ترقصوا
على نبض شـُوقــُه
من غير حساب لـ ليه و إمتـَى و ازاي و فين
وافـُوق ..
ألاقي شمسك لسَّه نايمه ف حضن قـَلـَقي
ترجع لعيني صورة الصَّحاري
و غراب حزين واقف بيصرخ
يندَه أليفه
أرجع بسرعة لحلم اللـُّقا تاني
و اعيش معاكِ ألف عمر استنظرك
*
السبت, 01 اغسطس, 2009
و قلت استنـَـى شوف شوقه يحن إليك بلاش ابدأ أكيد هيحس بيك .. يناديك و تفرح بالنـَّـدى يعطـَّر سهاد لياليك لقيت الكبرياء حَرَّض و حال بيني .. و شوقها عنيك ساعات بنحِسّ جوَّانا بحلم جميل و نور الفرحة يرحمنا سواد الليل ساعات نضحك نخاف منها .. بسرعة نقول .. يارب خير عشقنا الحزن من بدري بنوشم بيه ليالينا و لو شفنا القمر يضوي نخاف م الفرحة تكوينا نسينا العمر بيعَدِّي و يجرح نور مآقينا و مش عارف .. ليه الفرحة تخوِّفنا و ليه مات الأمل فينا
و تبقـَى الضحكة وَحشانا
الاحد, 19 يوليو, 2009
بالدولار اعبُر قناتنا بالدولار زور المتاحف الدولار لخبط حياتنا و الجنيه عايم و خايف مالنا يامَّه بالدولار الدولار عـُـمْلة عدوِّي أفتكر و احنا صغار كان جنيهنا فوق بـِيـِضـْـوي لمَّا أصبحنا كبار ليه طفينا نوره دوغري عيب علينا و ألف عار نحني هامته للي ما يساوي حتى شتمة م الشفايف دا الدولار لخبط حياتنا و الجنيه من أمُّه خايف ليه نطفـِّشهـُم ولادنا مُبدعينا هـُمَّا زادنا هـُمَّا أحلامنا ف بُكره فخرنا و على راسنا تاجنا ابتكاراتهم تخلينا يامَّه أكبر م الكبار مش حماية للدولار دا الدولار لخبط حياتنا و الجنيه من أمُّه خايف
الاثنين, 11 مايو, 2009
تؤمن يا روحي بالقدر
و هتعَوِّد ..
أشوف حبيبي ..
و كأني يعني ما شفتهوش
اللي واجعني
انه يعدِّي و ف عقل باله
يقول كأني ما بعرفوش
شكرا حبيبي
يمكن تساعد ع النسيان
أدمنت حبك
تقدر تداوي من الإدمان ؟
حاول ..
و انا برضه احاول
ماهو يوم قالوها
شكرا لنعمة النسيان
لكن صارحني
لو حبي عشش جوَّه قلبك
لو عدَّى يومك كأنه دهر ف بُعدي عنك
لو يوم تحسّ الليل طويل
نسياني صار شيئ مستحيل
إرجع لي تاني
هتلاقي قلبي فاتح بيبانه
هتلاقي نفسك مالي كيانه
لأنه حَبِّك فوق طبيعة البشر
فوق خيال شاعر بيحلم بالقمر
حُبَّك قـَدَر
و انا بابتهـِل في كل لحظة
،
الاثنين, 06 اكتوبر, 2008
البداية حكاية فعلا بس رأيي فيها أصعب يوم ركبنا الحلم جمعا و اتفاجئنا ، الحلم مُتعب قالوا فـُـزنا .. فرحنا طبعا جينا نحصُد إلتقينا بعد يونية كنـَّا أكرم أحكي تاني ؟ لا يا ياخويا
عيد سعيد و الله أعلم
الخميس, 08 نوفمبر, 2007
أنا عاشق و لكن عشقى لعيونك يفوق الوصف و باعشق روضة الأهداب إذا نامت على استحياء فى ضِلَّها تنتشى الكلمة بشهقة حرف أنا عاشق صهيل الشوق فى عنيكِ و رعشِة ضمَّة .. لإيديكِ و آهة ليلة سهرانة و غنوة ضعف أنا عاشق حروف إسمى إذا غنـَّـاها موَّالك أعيش الجَنـَّـة فى رحابك يغير الحور من صوتك قيثارة حنون تطربنى بسحرِ العزف أنا عاشق و عشقى لصوتك الدافى يفوق الوصف أنا عاشق أغيب عنك آجيلك .. أرتوى شهدك و ابوحلك أدِّ ايه شوقى لروحك كان يفوق الوصف و عشقى غنوة العُشـَّـاق
السبت, 14 يوليو, 2007
فوق يا عربى __________________
فوق يا مصرى
قوللى سلاحك ليه بيْصَدِّى
ياللى عَمَلْت مِن الأصنام
صهيونى أو خِلْفِة سام
مثـَلَك .. و نسيت الرحمن
مَسَخوك . خلُّوك تمثال عصرى
اقرا تاريخك تعرف منُّه
إن المصرى جريئ إكمنُّه
يعرف ربُّه و مؤمن إنُّه
محا هكسوس م الدنيا .. و تترِى
ليه بتخلِّى فران الأرض
تسخر منـَّك .. قول .. مَ ترُد
و انتَ اللى محمَّد قال عنـَّك
إنتم خير أجناد الأرض
و اتأخـَّرت ف عالم يجرى
كفاياك نوم .. قوم و انفض خوفك
خلَّى ولادك يوم ما تشوفك
فى تاريخ متسَطـَّر بحروفك
تتباهى و تقول أنا مصرى
الأقصى بينادى .. يا ديك
قوم وادَّن للفجر .. يجيك
لا تخاف من نـّعـْرة أعاديك
يوم تصحى .. هيْفِر .. و يجرى
فوق يا عربى
فوق يا مصرى
فــــوق
.
السبت, 14 يوليو, 2007
مصطفى طراد / فى 7/8/2006
انت السبب
انا السبب
ودِى .. وِدَا بَرْضُه السبب
فضلنا نايمين لما شفنا بعنينا العجب
الأرض جرَّفها العطب
القمح أسطورة كُتُب
و القطن و كيزان الدُّرة
ضاعوا كمان حتى الحطب
و رجعنا نشتاق الرغيف
لو ننشتم أو ننضرب
حتى الكرامة اتبدِّلِت .. حَبِّة لِعَبْ
مين السبب ؟
إحنا السبب
السبت, 14 يوليو, 2007
و انت غايب
ما فى غير طيفك حبيب
ما فى نور ، ولا نهار
أقضى طول وقتى انتظار
شوقى ينزفنى لهيب
و انت غايب
ما ابغى اشوف ف الكون حد
يحترق من شوقى وجد
حتى نفسى حتى روحى
أشعر انى فِىَّ غريب
و انت غايب
أسأل الظلمات وين وجه القمر
و اسأل السماوات وين غيم المطر
كل ما يَرِد سمعى أنين
حتى صوت العصافير بيصير نحيب
و انت غايب
<<الصفحة الرئيسية
.
.