معقول .. !

أسهر مشتاقلك عمر بحاله و ليلي يطول

معقول .. !

و لا تبعت كلمة تطمِّن قلبي عليك

و لا تيجي تنوَّر ليلي بسحر عنيك

معقول ... !

ميهزِّش قلبك دَمع الشـَّمع ..  ؟

صدَى صوتي مَدَقـِّش باب السَّمع .. ؟

معقول ... !

إن كنت مخاصم .. هستناك تيجي و تصارح

دنا قلبي ف حبك و الأيام قالوا نتصالح

معقول ... !

يخاصمني النـُّور ؟

و الغنوة الحلوة تصبح لحن حزين مكسور ؟

معقول ... !

علشان على همس حنينك .. اتعَوِّدت

مانا كنت راضي بوحدتي

صابر و عايش إسمِتي

صَحِّيتي ف الدنيا الجَمَال

و كان خيال عمري بيه ما حلِمت

حاولت .. صدقني يا خِلّ الفؤاد .. مَاقـْدِرْت

علشان على همس حنينك .. اتعَوِّدت

كان بس مالي و مال عيونك يسحروني

والاَّ البلابل اللي ف صوتك يغنولي

يدَوَّخوني

يدخـَّلوني بحر الغرام .. و يغرَّقوني

مانا عِشت ناسي غنوتي

ناسي ملامحي و بَسمتي

رجَّعتِ ليه فِيَّا الأمال

مانا كنت راضي بعُزلتي و الصمت

حاولت .. صدقني يا خِلّ الفؤاد .. مَاقـْدِرْت

ايه رح يفيدك م الدلال و الصَّد        

عايز تشوف على قلبي أثر البُعـْد ؟

شوف يا حبيبي ان كان عذابي يفرحك

والاَّ سهادي يسعدك في مَطرحك

إفرح كثير .. مِن غير وجودك ضِعت

حاولت .. صدقني يا خِلّ الفؤاد .. مَاقـْدِرْت

انا فين ؟

انا المنقوش على جبينك

و جوَّه الننى .. فى عيونك

أنا  فيكِ وريد ينبض حروف اسمك

لأنى عاشق ...  و عشقانى

كتبت ميلادى ..  يوم حُبك

عرفتِ ليه انا منقوش على جبينك ؟

لآنك وشم فوق روحى

و عشقك غنوتى و بوحى

ف قربك .. شوقى يسبقنى

ملاكي

حلم أحلامى

بيكبر ( طِفـْـلـُه ) قـُـدَّامى

أعيشه ف صحوى .. و منامى

م نا عاشقك و عشقانى

الحياة ويَّاكى ليها طعم تانى

و الأمانى

كل يوم تكبر معاكى

يا ملاكى

ضحكتك ف حياتى أجمل م الأغانى

و لـ زمانى

فجر مستنى نـَـدَاكى

و ف  هواكى

روحى هايمة شوق و لهفة

تجرى لو طيفك ندانى

تحضن الأيام و تسبح فى فضاكِ

اتنفسينى

 اعيش معاكى

و اعشقك